«Тарбағатай» мемлекеттік ұлттық табиғи паркінде орманның санитарлық жағдайын бақылау мақсатында тұрақты түрде орман-патологиялық зерттеулер жүргізіледі. Зерттеу барысында ағаштардың жай-күйі бағаланып, аурулар мен зиянкестердің белгілері анықталады, зақымданған учаскелер есепке алынады. Мұндай жұмыстар орман экожүйелерінің тұрақтылығын сақтауға және қауіп-қатердің алдын алуға мүмкіндік береді. 

 

 Санитарлық бақылау нәтижесінде қажет болған жағдайда санитарлық-сауықтыру іс-шаралары ұйымдастырылады. Оларға қураған және зақымданған ағаштарды жою, орманды тұрмыстық және табиғи қалдықтардан тазарту, зиянкестердің таралу ошақтарын оқшаулау сияқты жұмыстар жатады. Бұл шаралар орманның жалпы жағдайын жақсартып қана қоймай, өрт қауіптілігін де төмендетеді. 

 

 Сонымен қатар орманның санитарлық жағдайына климаттық өзгерістер, құрғақшылық, қатты жел, қар сынуы сияқты табиғи факторлар да әсер етеді. Осы себепті орманшылар мен мамандар орман алқаптарына тұрақты мониторинг жүргізіп, туындаған өзгерістерге дер кезінде әрекет етеді. 

 

 Орманды сақтау – тек орман қызметкерлерінің ғана емес, әрбір азаматтың ортақ міндеті. Табиғат аясында демалған кезде тазалықты сақтау, қоқыс қалдырмау, өрт қауіпсіздігі талаптарын орындау және табиғатқа жанашырлықпен қарау арқылы әркім орманның санитарлық жағдайын жақсартуға өз үлесін қоса алады. Орманды қорғау – болашақ ұрпаққа жасыл мұра қалдырудың маңызды кепілі.  

 

Авторы: Нұрлан Тұяқбаев,

орман патолог инженері.

Автор: Туякбаев Нурлан, инженер-лесопатолог.