Күз — Тарбағатай тауларындағы табиғаттың ерекше кезеңі. Салқын леп сезіліп, өсімдік жамылғысы өзгерген сайын таудың тағы бір тылсым тіршілік иесі — Тянь-Шань қоңыр аюы да белсенді тіршілік етеді.
Тянь-Шань қоңыр аюы — «Тарбағатай» мемлекеттік ұлттық табиғи паркінің сирек кездесетін жануарларының бірі. Қазақстанның Қызыл кітабына енгізілген бұл аң таулы экожүйенің табиғи тепе-теңдігін сақтауда маңызды орын алады.
Күзгі уақытта аюлар қорек іздеп, таулы алқаптар мен орманды жерлерді аралайды. Қысқы тыныштық кезеңіне дайындық барысында қорек қорын толықтыруға ерекше көңіл бөледі. Табиғаттағы әрбір қимылы — тіршілік заңдылығының бір көрінісі.
Аюлар көбіне жалғыз жүреді. Ал қонжықтары бар аналықтары аса сақтық танытып, адам көзінен аулақ болуға тырысады. Бұл — жабайы табиғаттағы ұрпақты қорғаудың табиғи тәсілі.
Тарбағатайдың тауларында тіршілік ететін әрбір аю — табиғи ортаның ажырамас бөлігі. Оның мекенін қорғау — тау экожүйесінің тұтастығын сақтау деген сөз.
Автор:
Ғылым, ақпарат және мониторинг бөлімі
