2025 жылғы 17 қыркүйек күні “Тарбағатай” мемлекеттік ұлттық табиғи паркінің Экологиялық ағарту, рекреация және туризм бөлімінің қызметкерлері, сондай-ақ Үржар және Қарабұйрат орманшылықтарының мемлекеттік инспекторларының қатысуымен “Таза Қазақстан” экологиялық акциясы аясында “Мөлдір бұлақ” атты табиғатты қорғау іс-шарасы ұйымдастырылды.
Акцияда Барқытбел ауылының сыртында орналасқан табиғи бұлақ көздері тазартылды. Бұлақ маңындағы шөп-шалаң, қураған өсімдіктер мен тұрмыстық қалдықтар жиналып, бұлақ көздері қалпына келтірілді.
Іс-шара барысында 0,1 гектар аумақ тазартылып, 0,02 тонна тұрмыстық қоқыс жиналды. Жиналған қалдықтар арнайы техниканың көмегімен қоқыс полигонына жеткізілді.
Жалпы 27 адам қатысқан бұл экологиялық акция қоршаған ортаны сақтау, табиғи су көздерін ашып-тазалау арқылы экожүйенің тепе-теңдігін сақтау және болашақ ұрпаққа таза табиғатты аманаттау мақсатын көздеді.
Айта кету керек, аталған бастама ұлттық парк аясында биылғы жылы екі мәрте жүзеге асырылған. Себебі, бұлақ — тіршілік бастауы. Оның көзін ашып, айналасын таза ұстау — әрбір азаматтың табиғат алдындағы борышы.
Мұндай шаралар экологиялық мәдениетті қалыптастырып, тұрғындар мен жастардың табиғатқа деген жанашырлығын арттыруға бағытталған. Жыл сайын дәстүрлі түрде өткізіліп келе жатқан бұл игі істер алдағы уақытта да жүйелі түрде жалғасын табатын болады.