2025 жылдың қаңтар айының 29-ы күні Экологиялық ағарту, рекреация және туризм бөлімінің қызметкерлері "Таза Қазақстан - 2025" экологиялық акциясы аясында Үржар ауданы, Қазымбет ауылының "Қазымбет орта мектеп-бақшасы" КММ-сінің жоғарғы сынып оқушыларымен бірлесіп, "Электр энергиясын үнемдейік!" тақырыбында экологиялық акция өткізді. Акцияға "Үржар" орманшылығының мемлекеттік инспекторлары да атсалысты.
Электр энергиясын үнемді тұтынудың пайдасы зор. Ол қоршаған ортаны сақтау факторларының бірі. Себебі, біз энергияның негізгі бөлігін табиғи ресурстардан аламыз. Көмір, мұнай және газ қалпына келмейтін пайдалы қазбаларға жатады. Электр энергиясын өндіру үшін көмір жағамыз, радиоактивті отынды пайдаланамыз, өзендерге тосқауыл қоямыз. Осылайша, қоршаған ортаға теріс әсерін тигізеді. Кез келген электр станциясы қоршаған ортаға белгілі бір деңгейде зиян келтіреді. Сол себепті электр энергиясын үнемдесек, электр станцияларының қажетті қуаты айтарлықтай азаяды. Яғни, электр энергиясының өндірісі табиғи ресурстардың көп мөлшерін қажет етеді.
Акция барысында оқушыларға слайдтар көрсетіліп, буклеттер үлестірілді, түсіндірме жұмыстары өткізілді. Олар сол арқылы көптеген мағлұматтар алды. Әсіресе, электр энергиясының табиғи ресурстардан алынатынын, қыс айында электр энергиясын тұтыну деңгейі анағұрлым артатындығын біліп, энергияны үнемдеудің тәсілдерін үйренді.
Акцияға қатысушылардың жалпы саны - 23 адам.
Экскурсия жетекшісі: Ришат Көрпешов.
