2025 жылдың 26 наурызында "Тарбағатай" МҰТП" РММ директоры А.Серкебаев пен директор орынбасарының м.а. Н.Дүйсекеновтың басшылығымен инженерлік-техникалық қызметкерлер мен мемлекеттік инспекторларға жалпы жиналыс өтті.

         Жиында ұлттық парктің қызметін тиімді ұйымдастыруға бағытталған бірқатар өзекті мәселелер қарастырылды:

✅ Ерекше қорғалатын табиғи аумақтар заңнамасының сақталуы.

         Табиғатты қорғау талаптарының бұзылмауы қатаң бақылауда болуы тиіс екендігі, сондай-ақ ұлттық парктің экожүйесін сақтау үшін заңнаманың барлық нормаларын орындау – басты міндеттердің бірі екендігі ең бірінші айтылды.

✅ Заңсыз аңшылықтың алдын алу – ұлттық парк инспекторларының негізгі бағыттарының бірі. Бұл мәселе бойынша рейдтік жұмыстарды күшейту, заманауи бақылау құралдарын қолдану және жергілікті тұрғындар арасында түсіндіру жұмыстарын жүргізу қажеттілігі ескертілді.

✅ Сыбайлас жемқорлықпен күрес.

         Қызметкерлердің адалдығы мен кәсібилігін қамтамасыз ету – басты қағидат. Жемқорлық тәуекелдерін болдырмау үшін ішкі бақылау шаралары күшейтіліп, заң бұзушылыққа жол бермеу талап етілді.

✅ Ұлттық парк техникалары мен мемлекеттік инспекторлардың өрт қаупі маусымына дайын  болуы.

         Орман өрттерінің алдын алу – табиғатты қорғаудың маңызды бөлігі. Осыған байланысты өртке қарсы техника мен жабдықтардың дайындығын тексеру, 4 орманшылықтарда инспекторларды арнайы оқу-жаттығудан өткізу және өрттің алдын алу шараларын жүргізу тапсырылды.

✅ Әдеп кодексінің сақталуы.

         Ұлттық парк қызметкерлері халықпен және әріптестерімен қарым-қатынаста этика нормаларын сақтауы қажет. Қызметтік міндеттерді орындау барысында әдеп нормаларын бұзуға жол берілмейтіні, ішкі тәртіптің және киім кию тәртібінің сақталуы айтылып өтті.

✅ Еңбек кодексінің талаптарын орындау.

         Мемлекеттік инспекторлардың жұмыс уақыттарында өздеріне бекітілген аумақта болулары, құрылғыларға ұқыптылықпен қараулары, қауіпсіздік шараларын сақтау, әсіресе, кене мен улы жәндіктерден сақтанулары қатаң ескертілді.

✅ Орманды жанама пайдалану ережелерін сақтау және іске асыру.

         Ұлттық парк аумағында табиғи ресурстарды (мал жаю, шөп шабу) тиімді және заң аясында пайдалану мәселелері қарастырылды. Бұл ретте табиғатқа зиян келтірмеу басты талап болып қала береді. Мал табынын ұлттық парк аумағынан өткізіп қана қоймай, санитарлық тазалықтың сақталуын қадағалау тапсырылды.

         Жиын соңында ұлттық парк директоры А.Серкебаев барлық жауапты тұлғаларға белгіленген тапсырмалардың уақытылы және сапалы орындалуын қатаң бақылауда ұстауды тапсырды.

Ұлттық парктің баспасөз қызметі.