- Толығырақ
Жаз күндерімен бірге табиғат аясына барып демалушылардың да саны арта түседі. Қарапайым ережелерді сақтамағандық орны толмас апатқа алып келуі мүмкін.
Өрт табиғатымыздың баға жетпес байлығына үлкен зиян келтіреді, ал оны қалпына келтіру үшін жүздеген жылдар керек.
“Тарбағатай” ұлттық паркі жылда маусым алдында өрт-тактикалық жаттығуларын өткізіп, инспектор құрамы арасындағы өзара бірлесіп қимылдау әдістерін жетілдіріліп, техникалар мен құрал-жабдықтардың дайындығын тексереді.
Сіздің қауіпсіздігіңіз үшін табиғатта не істеуге болмайды:
-арнайы экскурсиялық соқпақтар мен туристiк маршруттардан тыс жерлерге келiп кiруге және олар арқылы жүрiп өтуге;
-арнайы белгіленген және жабдықталған орындардан тыс жерлерде от жағуға, мангал, ошақ орнатуға;
-табиғат, тарих, мәдениет және археология ескерткіштерін қиратуға және бүлдіруге;
-топырақ қабатын тұрмыстық қоқыспен және қалдықпен ластауға.
Мемлекеттік инспекторлар табиғатта болу ережелері мен өрт қауіпсіздігі техникасын сақтауға шақырады!
Баспасөз қызметі.
- Толығырақ
Елімізде ағашты заңсыз кескен адам қылмыстық жауапкершілікке тартылады. Бұрын мұндай заңбұзушылылық үшін аз ғана айыппұл салынып келсе, қазір заң түбегейлі өзгерді. Ағаштарды заңсыз кесу себептерінің бірі – құқық бұзушыларға қойылатын жауапкершіліктің төмендігінен.
ҚР Қылмыстық Кодексiнің 340-бабында Ағаштар мен бұталарды заңсыз кесу, жою немесе зақымдаудың жазасы қарастырылған. 2-тармағында айтарлықтай залал келтіре отырып, орман қорына кіретін ағаштарды және бұталарды заңсыз кесу, жою немесе зақымдау –
мүлкі тәркіленіп, белгiлi бiр лауазымдарды атқару немесе белгiлi бiр қызметпен айналысу құқығынан үш жылға дейiнгi мерзiмге айыра отырып немесе онсыз, екі мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына, не алты жүз сағатқа дейiнгi мерзiмге қоғамдық жұмыстарға тартуға, не үш жылға дейінгі мерзімге бас бостандығын шектеуге, не сол мерзімге бас бостандығынан айыруға жазаланады.
Егер ерекше қорғалатын табиғи аумақтарда (бұдан әрі - ЕҚТА) жасалған іс-әрекет болса, жоғарыда аталған жазаның мерзімдері мен мөлшері күшейтіледі. Яғни, айыппұл - үш мың айлық есептiк көрсеткiшке, қоғамдық жұмыстарға тарту - сегіз жүз сағатқа дейiнгi мерзiмге, бас бостандығын шектеу мерзімі - бес жылға ұзарады.
Сондай-ақ Әкімшілік құқық бұзушылық туралы кодекске өзгерістер енгізілді. Оған сәйкес орман қорына кіретін ағаштар мен бұталарды заңсыз кескені, жойғаны немесе бүлдіргені үшін 50 АЕК-ке дейін залал келтіргені үшін жаза 100 АЕК-ке, ал залал мөлшеріне байланысты 1000 АЕК-ке дейін айыппұл салуға әкеп соғады. Ерекше қорғалатын табиғи аумақтарда жасалған дәл осындай әрекеттер жеке тұлғаларға – 150 АЕК, лауазымды адамдарға, шағын кәсіпкерлік субъектілеріне немесе коммерциялық емес ұйымдарға – 450 АЕК, орта кәсіпкерлік субъектілеріне – 600 АЕК, ірі кәсіпкерлік субъектілеріне - 1500 АЕК мөлшерінде айыппұл салуға әкеп соғады. Көрсетілген бұзушылықтарды жасау құралы болып табылған ағаштар мен бұталар, көлік құралдары және бұзушының өзге де заттары тәркіленеді. Айта кетейік, 2024 жылы 1 АЕК мөлшері 3692 теңгені құрайды.
Ағаштарды кесуге рұқсат етілген және тіпті жоспарланған жағдайлар да бар. Алайда ол үшін арнайы рұқсат қажет. Кесуге жататын ағаштардың көлемін ұлттық паркіміздің Табиғи кешендер мен объектілерді өсіру және табиғатты пайдалану бөлімі анықтайды. Бұл ағаштар санатына өлі, әлсіреген және піскен екпелер немесе өрттен кейінгі ағаштар жатады. Олар орман ауруларын тудырып, сау ағаштарға қауіп төндіреді. Сондықтан оларды уақтылы алып тастап отыру керек.
Инженерлер өз деректерін Абай облыстық орман шаруашылығы және жануарлар дүниесі аумақтық инспекциясына ұсынады. Осыдан кейін экологиялық сараптама жүргізіліп, Орман шаруашылығы және жануарлар дүниесі комитеті осы ағаштарды кесуге рұқсат береді.
Мұндай фактілерді жою, ағаштарды заңсыз кесудің алдын алу үшін жауапкершілікті күшейту және айыппұлдардың өсуі маңызды рөл атқарады. Алайда бұл жолда ең маңызды қадам – экомәдениетті қалыптастыру мен ерте жастан тәрбиелі білім беру. Экологиялық мәдениет төмен болғандықтан заңбұзушылар табиғатқа қасақана зиян келтіреді. Сонымен бірге ол тәрбие - экологиялық мәдениеттің маңызды құрамдас бөлігі. Ұлттық парк қызметкерлері халық арасында экологиялық мәдениетті қалыптастыру жолында экологиялық іс-шаралар атқаруда.
«Тарбағатай» МҰТП мемлекеттік инспекторы Марат Қасенов.
- Толығырақ
ШҚО, Зайсан ауданында орналасқан «Тарбағатай» (зоологиялық) қаумалының мемлекеттік инспекторлары шаруа қожалықтарына өрт қауіпсіздігі және тазалықты сақтау бойынша үгіт-насихат жұмыстарын жүргізіп, үнпарақтар таратты.
Баспасөз хатшысы Ә.Көбенова
- Толығырақ
Шілде айының 16-сы күні ұлттық парктің мемлекеттік инспекторлары қажетті құрал-жабдықтармен жабдықталып, сенбілікке шықты. Қызметкерлер аумақты ретке келтіруге ерекше құлшыныспен белсене кірісті: олар Ақтоғай өзенінің жағалауына тазарту бойынша сенбілік және орамдық бағаналарды түгендеу, жаңарту бойынша жұмыстар жүргізді, сондай-ақ жолдарды құлаған тастардан тазартты. Ортақ күш-жігердің арқасында бірнеше сағат ішінде аумақ өзгеріп, барлық жерде тазалық орнады.
Бұл шара тұрғындардың табиғатқа деген жақсы қарым-қатынасын қалыптастыруға және табиғат тазалығын сақтау және экологиялық мәдениетті қалыптастыру мәселелеріне қоғам назарын аудартуға, санитарлық жағдайын жақсартуға бағытталды.
Құрметті аудан тұрғындары! Туған өлкеміздің тазалығы сенбілік шараларымен шектеліп қалмауы керек. Сондықтан әрбіріңізді тазалық жұмыстарын жүргізіп, айналамыздың ажарлана түсуіне үлес қосуға шақырамыз!
- Толығырақ
Қазақстан Республикасы Экология және табиғи ресурстар министрлігі «Таза Қазақстан» ауқымды акциясы аясында @TazaQazBot ыңғайлы телеграм-чат-боты арқылы жергілікті мекеннің және экология мәселелері туралы өтінімдер берудің жаңа сервисін әзірледі.
Бұл елдің әрбір қамқор тұрғынына проблемалық жерлерді бірден суретке түсіруге немесе галереядан суреттерді жүктеуге, орналасқан жерін көрсетуге және мәселені егжей-тегжейлі сипаттауға мүмкіндік береді.
Өтінім түріндегі барлық ақпарат операторға жергілікті атқарушы органнан келіп түседі, ол оны жүктейді және орындаушыны тағайындайды.
Сонымен қатар, тұрғындар жолдардың, саябақтардың, кіреберістердің, жарықтандырудың, абаттандырудың және қоғамдық және жеке аумақтардың санитарлық жағдайына қатысты көптеген мәселелер туралы хабарлай алады.
Өтінім санатына байланысты орындаушы тапсырманы орындауы тиіс уақыт автоматты түрде белгіленеді. Жұмыс аяқталғаннан кейін Орындаушы фотосуретті және қажет болған жағдайда түсініктеме береді.
Кері байланыс ретінде пайдаланушылар орындаушыны тағайындау және жұмысты аяқтау туралы хабарламаларды тікелей Телеграм-ботта алады. Өтінімді орындағаннан кейін олар орындалған жұмыстың сапасын бағалап, барлық өтінімдерін қарай алады.
«Таза Қазақстан» сервисі әрбір азаматқа тазалық пен тәртіпті сақтауға белсенді қатысуға мүмкіндік бере отырып, еліміздегі халықтың өмір сүру сапасын жақсартуға бағытталған.
Бірлескен күш-жігердің арқасында біздің кең еліміздің әрбір елді мекені таза әрі экологиялық қауіпсіз болады деп сенеміз.
- Толығырақ
2024 жылы 8 шілдеде Мемлекет басшысы «ҚР кейбір заңнамалық актілеріне ерекше қорғалатын табиғи аумақтар және электр энергетикасы мәселелері бойынша өзгерістер мен толықтырулар енгізу туралы» Заңға қол қойды.
Заңнамада қандай басты өзгерістер қамтылды?
Салық кодексінен Ерекше қорғалатын табиғи аумақтарды (ЕҚТА) пайдаланғаны үшін алынатын төлем республикалық бюджетке түсетіні туралы нормалар алынып тасталды.
Сәйкесінше, ҚР Бюджет кодексінің республикалық және жергілікті маңызы бар Ерекше қорғалатын табиғи аумақтарды пайдаланғаны үшін бюджет түсімдері қарастырылған нормалары өзгерді.
Табиғат қорғау мекемелері көрсететін қызметтер үшін тарифтердің мөлшерін бекіту құзіреті ЕҚТА-ны бақылайтын мемлекеттік органдарға беріліп отыр.
➡ Толығырақ: https://www.gov.kz/memleket/entities/forest/press/news/details/807511?lang=kk
- Толығырақ
Құрметті Үржар, Мақаншы аудандарының тұрғындары! Бұл жолы біз заңсыз ағаш кесу мәселесін қозғауды жөн көріп отырмыз. Бұл проблеманың әсіресе жыл соңы жақындап, қыс мезгіліне отындық ағаш дайындау кезінде өзектілігі арта түседі. 2023 жылы аталған мәселе бойынша 1 заңбұзушылық фактісі орын алған. Атап айтқанда: 2023 жылдың 8-маусымында Мақаншы ауданы, Көктал ауылының тұрғыны «Тарбағатай» мемлекеттік ұлттық табиғи паркі республикалық мемлекеттік мекемесі аумағына қарасты «Қатынсу» өзенінің орман қорына кіретін ерекше қорғалатын табиғи аумағының 36 - орам 19- телімінде өсіп тұрған 1,945 куб «ИВА» ағашын заңсыз кесіп өз іс-әрекетімен орман қорына 13 420 тг залал келтіргені және ҚР әкімшілік құқық бұзушылық туралы кодексінің 381-1 бабының 3 - бөлігіне сәйкес заң бұзушылық фактісі анықталды. Аталмыш заң бұзушылық бойынша кінәлі адамға хаттама толтырылып, заңсыз ағаш кесу фактісі бойынша қажетті құжаттар жинақталып сотқа жолданған. 2023 жылдың 22-маусымында Сот шешімімен заң бұзушыны кінәлі деп танып, көрсетілген бұзушылықты жасау құралдары және өзге де заттары тәркілене отырып, 362 250 (үш жүз алпыс екі мың екі жүз елу) теңге айыппұл салынды.
Осы фактіні ескере отырып сіздерді Үржар, Мақаншы аудандары бойынша көрікті де әсем табиғатымызды және табиғи байлықтарымызды (флора, фауна) сақтауға және заңсыз ағаш кесуге сіз бен біз болып жол бермеуге шақырамын.
Еске сала кетсек, ағаштар мен бұталарды заңсыз кесу, жою немесе зақымдау үшін әкімшілік және қылмыстық жауапкершілік қарастырылған. ӘҚБтК-нің 381-1-бабы бойынша санкция 50 АЕК-тен 150 АЕК-ке дейінгі айыппұлды көздейді. Ал көп мөлшерде залал келтірілген кезде ҚР ҚК-нің 340-бабы бойынша қылмыстық іс қозғалады, ол 160 АЕК-тен 10 жылға дейін бас бостандығынан айыруды көздейді.
Орындаған:
Үржар орманшылығының басшысы
Шәріпқанов Қуандық Серікұлы.
Серкебаев Айдын Серікұлы
«Тарбағатай» мемлекетік ұлттық табиғи паркі» РММ директоры